بتغير و زعلان من نفسك أو مكسوف أو بتكابر ..فالكلمتين دول ليك
مبدئيًا
الغيرة شعور طبيعي جدا تحس بيه احيانًا.. و ده مش معناه نقص ولا ضعف و لا عيب في شخصيتك .
كل ما تقاوم الشعور ده هزيد أكتر حتى لو تظاهرت بالعكس.. وبالتالي رفضك ليه مش هيسبب غير زيادة تعاسة و غضب جواك و هتفضل شايف نفسك قليل .
اعمل ايه ؟
اول حاجه لازم تعملها هى ((القبول))
لازم تقبل ان في حد أحسن منك في حاجة وده الطبيعي.
الناس كلها مش زي بعض.
و الأهم .. اقبل مشاعرك و نفسك وشخصيتك زي ما هيا من غير شروط.
صعب نتحكم في مشاعرنا لكن اللي مفروض نتحكم فيه هنا هو تصرفاتنا تجاه الشخص اللي بنغير منه ..
اسأل نفسك..
هل غيرتك بتخليك تشوه صورته ؟ تسخر منه ؟ تظلمة ؟ تكسره ؟
و لا العكس ؟
غيرتك بتخليك تظهر لطف أزيد من اللازم و تعوضه بمشاعر و تصرفات مش حقيقية و كدابة ؟
السلوك الصحيح في الموقف ده
انك تتحكم في تصرفاتك و تخليها محايدة من غير أفوره
حاول بقدر الإمكان تقلل احتكاكك بالشخص اللي بتغير منه لحد ما حدة مشاعرك تهدى و العاصفة تمر بسلام..
و أخيرا ..
اعرف إن كل واحد فينا ليه نقاط قوة و نقاط ضعف ..ماتحكمش ابدا على المشهد من صورة واحدة ..
لا تقارن.. لا تقارن ..لا تقارن ..لا تقارن
اشتغل على نفسك .. من جوه إنك تقبلها و تحبها و من بره إنك تحط أهداف و تركز في طريقك ده هيقلل فرص إنك تبص للي حواليك
و في الآخر اقبل نفسك يا صديقي
ليست هناك تعليقات:
إرسال تعليق